OBERNAAR 2020

Philipp Müller - Hilarius 100.

Hoch geschätzti Fasnachtsschaar,

 

eis isch sicher, eis isch mir klar.

Lang han ig uf dä Momänt he gwartet, 

ha chum chöne erwarte, bis die Zyt äntlich startet!

Mini Freud, die isch schlicht riesegross,

als künftige Obernaar fühl ig me famos!

 

Drum löit mich das a dere Stöu do säge,
ig wott mit euch zäme en ungloublechi Fasnacht erläbe!

Im närrische Kreis vo dr Oltner Fasnachtsfamilie,

ikleidet i ’ne ganz bsonderi und schöni Textilie, 

wott ig e Woche lang mit euch zäme liebi Frönde,

dr Funke für en fabulösi Fasnacht z Oute zünde.

Als neus Oberhaupt übernehm ig seriös d Exekutive,

säubschtverständlech vergess ig aber au nid die wichtig Apéritive!

 

Die meischte vo euch, froge sich a dere Stöu,

was isch das für ’ne komische, was wott de schregi Gsöull?

Drum pack ig d’Chance, isch das nid wonderbar,

mi Name isch Hilarius, s’nöchscht Joohr dr Obernaar! 

 

Mis Gelt verdien ig als Sekundarlehrer,

das isch kei liechte Job, drum bin ig ou chli schwerer.

Sit über zwänzg Johr schaff ig z’Gösge i dr Kreisi,

wenn mit so vöu Lüt tuesch schaffe, muesch au nie elei si.

Mis grosse Hobby, jo das isch s’ Theater,

dört spiel ig mängisch sanft, cha aber ou rabiater.

So weiss ig nach unzählige schöne Uftritte,

d’ Ufgab als Obernaar isch für mich uf e Liib gschnitte!

 

E witeri Passion vo mir, jo ig tue sehr gärn reise, 

ir unterrichtsfreie Zyt do zieni gärn ganz wyti Kreise!

Mis fahrende Hotel isch mis alte, grüene VW-Büssli,

e so go d’Wält erkunde isch för mich meh als es Gnüssli.

Mi Akku lad ig uf immer of mine schöne Toure,

so louf ig ou nie Gfahr, dass e im Alltag chönt versuure.

 

Zu 100 Prozänt,versproche, stohn ig für d’ Oltner Fasnacht i,

aus Obernaar isch klar, muess das natürlech au so si. 

I minere Zunft zu Hilari isch es mit der Fründschaft au e so,

aus Zünfter bin ig Brüeder oder of Neudütsch halt en „BRO“!

 

Mis Kommitment hani gäh, chönds glaube, s’esch nid nome Schiin,

e fröi mich sehr als Hilarius euche Obernaar dörfe z sii!

So bin ig aus Obernaar Hilarius,

für das Johr euche Fasnachtsprimus. 

En oBRO, of Neudütsch also, chönt me e so säge, 

wo en onvergässlichi Fasnacht mit euch zäme wott erläbe!
 

Hilarius dr 100. –euche Obernaar! 

HILARI-ZUNFT ZU OLTEN, 4600 Olten

© 2016 Hilari-Zunft zu Olten. Realisation by RELOUNGE

  • Facebook Clean